Daag van de nuuje AAP, zondaag 7 januari 2018

Dit jaor woor ‘t de beurt aan prins Maikel I (Heber) om veur ‘t eers mèt te gaon mèt de Azeraose Aad Prinse. Idderein woor op tied aanwezig en dus kós begós waere mèt ‘t zinge van oos Aapeleed. Tiedes ‘t leed en sjaele kal van Pieter Classen woor d’r auch ein life oetzending op Facebook. Mer op èns kump d’r eine auto aangesjeurt en sjtappe d’r twee gemaskerde kaerels oet. Die griepe zich Pieter en sjeure d’r vandoor. Alle Aape sjtaon vertwiefelt te kieke en sjnappe effe neet waat der is gebeurt. Maar op ein gegaeve moment beginne de meiste toch te lache.

Tja, dan maar verder zónger Pieter. Dus alle Aape make aansjtalte om in de huifker te sjtappe. En op det moment kump weer dae waage aangereje en sjtop mèt piepende remme. Weer sjtappe twee gemaskerde kaerels oet en gooie Pieter oet de waage. “veer höbbe de verkeerde mitgenaome” en ze pakke Aap Dennis II vas en sjleure hem de waage in. Nao dit hektise begin sjtappe veuer in de huifker (mit Pieter) en gaon op waeg nao de Huifkarhoeve in Vlodrop.

Effe veurbiej Kloostershof sjtaon de kidneppers saame mit Aap Dennis II klaor mit ein sjpandook. Dao sjtaon inkele name op van Maikel I zien veroveringe in zien prinsesezoen. Veer rieje röstig door mit de huifker. Oppe rotonde van Herkebos sjtaon ze weer klaor mit ein sjpandook en vuurwerk. Auch op dit sjpandook sjtaon name van vrouwluuj (exe) en de vermelding “en nog 26 angere”.

Aangekómme biej de parkeerplaats van Staatsbosbeheer moog Maikel I raoje waem de aape zin die dao sjtaon. De eerste vraog dae hae sjtelt is: “hub ich mèt uch in bed gelaege?” Eine aap sjut jao en de anger twiefelt bliekbaar nog. Maar oeteindelijk wit Maikel waem dao sjteit, namelik zien mooder (die inderdaad mit hem in bed haet gelaege) en zien tante. Nao ‘t nuttige van get heerlike wors en kees en natuurlik eine jagermeister of ein sjroebeleerke gaon veur verder nao de Huifkerhoeve.

Dao aangekómme kènne veur geniete van ein “ongesensureerde” diashow van ‘t sezoen van Maikel I, mèt geweldige foto’s en filmkes. Nao de sjpek mit eier en get te drinke mooge Pieter en de adjudante Loek, Dennis II en Rik beginne mèt de veurdrach. ‘T hele sezoen kump aan bod. Dit sezoen sjtong op meer dan 10 kentjes A4-papier. Pieter begós mit ein vergelieking tusse Maikel en Jozef oet de biebel. Die geliekenis is eigelik bès waal groot!! Nao de veurdrag waere nog ein paar pilskes gedronke en ginge veur weer truuk op waeg nao de Aapeheul in de Duup.