AZERAOSE AAD PRINSE

 

Sjpek mèt ei


Eindelik weer eine “geweune” vastelaovend.

Waal haaje veur geine aad Prins óm as AAP in ós midde op te numme.
Auch kóste veur neet mèt de huifker nao vlorop. Det kós de pret neet drökke.
Ein alternatief programma goof oetkoms.

Óm 10 oer kwome veur biejein veur de Duup. Pieter haaj ein nuuj gitaar en zat daomèt ’t AAPe-leed in.
Aansjloetend vèrtèlde John waat de bedoeling woor en te voot ging ‘t gezelsjap nao de euverdèkte paarskaroesel biej Wiel Heber.
Dao zoote op ein grote sjtreuhaspel twee aape. Idderein kós raoje waem in dees twee aapepakke zote.
Dit doerde toch waal efkes en nao ein paar aanwiezinge van John kwoom Ger Hintzen en Astrid Rademakers achter de maskers oet.
Daonao waerde ’t gezelsjap getrakteerd op sjroebleer, jägermeister, wòrs en kees.

Veur die AAPe die nog väöl dòrs haaje kwoom Maikel nog mèt eine bak beer aan. Nao dit sjpel ginge veur truuk nao de Duup wo veur kóste aansjuuve veur eine gooje tejjer sjpek mèt ei.
Wie veur de flink vólle tejjer vèrmuibeld haje, zorgde Pieter ver ein leuk intermezzo.
Pieter haaj eine kwis samegesjtèld mèt vraoge die betrèkking haje op aad prinse. Róndj ein oer ginge veur nao de AAPe-heul, oftewaal ’t kafeeke van De Duup.
Vandao oet waerde ’t aaftraeje van Ronald as Vors en de installatie van de nuuje Vors, Dennis van den Hurck, gevolg.
Toen volgde ’t oetrope van de prinse van de Nachrätjes en De Zölderrate. De AAPe haolde daonao de nuuje Prins op oet de sjuur bie de femilie Berden.
Det woor nog ein hele kluif óm hem alik oppe buun te kriege, mer wie Cletus as Prins te veursjien kwoom woor det heel begriepelik.

Nao ’t nuttige van de neudige wórs, kees en gekleurde eikes, die Eric haaj vèrzorg, en nog “inkele” drenkskes kóste veur mèt ein vól(daon) geveul nao hoes.